ಹೆಜ್ಜೆ ಗುರುತುಗಳು

ಒದ್ದೆ ಮರಳ ಮೇಲಣ

ಹೆಜ್ಜೆ ಗುರುತುಗಳು

ಎಷ್ಟು ಕಾಲ ಇರಬಹುದು?!

ಕಡಲ ಅಲೆಗಳ
ಸಣ್ಣ ಹೊಡೆತಕ್ಕೇ

ಅಳಿಸಿ ಹೋಗಬಹುದು

ಮರಳ ಮೇಲಣ

ಹೆಜ್ಜೆ ಗುರುತುಗಳು

ಅಲೆಗಳ ಮರ್ಜಿಗೆ

ಕಟ್ಟು ಬಿದ್ದಿವೆ

ಆದರೆ...

ಮನದ ಮೇಲಣ

ಹೆಜ್ಜೆ ಗುರುತುಗಳು

ಅವಕ್ಕೆ ಯಾರ ಹಂಗಿವೆ?!

ಒಮ್ಮೆ ಒಡ ಮೂಡಿದರೆ ಸಾಕು

ಅಳಿಸಲಾಗದ ಗುರುತು

ತನ್ನ ಇರುವನ್ನು

ಮರೆಯಗೊಡದು

ಎಂದೋ ಸವೆಸಿದ ಹಾದಿಯ

ಸವಿ ನೆನಪಾಗಿ ಉಳಿದೇ ಬಿಡುತ್ತದೆ

ಎದೆಯಾಳದಲೆಲ್ಲೋ..

ಯಾರೋ ಅಪರಿಚಿತರು

ನಮ್ಮವರಾಗಿ ಇಟ್ಟ ಹೆಜ್ಜೆ

ಕಾಡುತ್ತದೆ, ಅವರಿಗೆ

ವಿದಾಯ ಹೇಳಿದ ನಂತರವೂ

ಹೃದಯ ಕಾಯುತ್ತದೆ

ಆ ಅಲೆಗಳಿಗಾಗಿ

ಎದೆಯ ಮೇಲಣಹೆಜ್ಜೆ ಗುರುತುಗಳ

ಅಳಿಸುವ ಸಲುವಾಗಿ

ಕಡಲ ತಡಿಯ

ಹೆಜ್ಜೆಗಳು

ಅಳಿಸಿದಂತೆಲ್ಲಾ

ಹೊಸಾ ಹೆಜ್ಜೆಗಳು

ಮತ್ತೆ ಮರಳ ಮೇಲೆ

ಚಿತ್ತಾರ ಮೋಡಿಸುತದೆ

ಮರಳ ಮೇಲಣ

ಹೆಜ್ಜೆ ಗುರುತುಗಳು

ಮತ್ತೆ ನೆನಪ ಕೆದಕುತ್ತದೆ...

ಆಷಾಡದ ಹೈಕುಗಳು

ಚಂದಿರನಿಲ್ಲದ ಇರುಳು
ಆಷಾಡದ ಗಾಳಿ
ನಿಟ್ಟುಸಿರು.


ನೀನಿಲ್ಲದೆ
ಬೆಳದಂಗಳು
ಉರಿಬಿಸಿಲು.


ಆಷಾಡದಿರುಳು
ಮೇಘಗಳ ಮರೆಯಲ್ಲಿ ಚಂದ್ರ
ಧರೆಗೆ ವಿರಹ.


ಆಷಾಡದ ಮಳೆಹನಿ
ಪ್ರೆಮಿಗಳ
ಕಂಬನಿ.


ಹುಣ್ಣಿಮೆಯ ರಾತ್ರಿ
ಒಂಟಿ ಚಂದಿರನಿಗೆ ಜೊತೆಯಾಗಲು
ಮೇಘಗಳ ಪೈಪೋಟಿ.


ವಸಂತದಿರುಳು
ರಾತ್ರಿರಾಣಿ ಅರಳಲು
ಚಂದ್ರೋದಯ.


ಹೂವು ಅರಳಿದಾಗ
ಮೊಡಿದ ಬಾವ
ಪ್ರೇಮ.


ನನ್ನವಳು ನಗಲು
ಬೆಳದಿಂಗಳ ಬೆಳಗು
ಚಂದಿರನಿಗೆ ಅಸೂಯೆ.

ಅಪರಿಚಿತರು

ಕತ್ತಲಲ್ಲಿ ಕರಗುವಾಗ
ನನ್ನಲ್ಲೇ ನಾ ಮರುಗುವಾಗ
ನಿನ್ನದೇ ನೆನಪು

ಅತ್ತು ಸಾಕಾದಾಗ
ಕಣ್ಣೊರಸಿ ನಕ್ಕಾಗ
ನಿನ್ನದೇ ನಗು


ದುಃಖಗಳ ಮರೆತಾಗ
ಸಂತಸದಿ ನಲಿದಾಗ
ನೀನೇ ಜೊತೆ

ಹೊತ್ತು ಕೊಲ್ಲುವಾಗ
ಏಕಾಂತವನು ಗೆಲ್ಲುವಾಗ
ನಿನ್ನದೇ ಮುಖ

ಕಷ್ಟವನು ಗೆದ್ದಾಗ
ಸಾರ್ಥಕಥೆಯ ಪಡೆದಾಗ
ನಿನ್ನದೇ ಹೆಸರು

ಮೌನವ ಮರೆತಾಗ
ಮಾತಿನ ಸವಿ ದೊರೆತಾಗ
ನಿನ್ನದೇ ನುಡಿ

ಮಳೆಯಲಿ ತೊಯ್ದಾಗ
ಕಣ್ಣಂಚು ನೆನೆದಾಗ
ನಿನೇ ಹನಿ

ಗೆಳೆತನ ಮುರಿದಾಗ
ನೀ ನನ್ನ ಮರೆತಾಗ
ನೀನೆಷ್ಟು ದೂರ !

ಮತ್ತೆ ನೀ ಸಿಕ್ಕಾಗ
ಕಣ್ಣುಗಳು ಬೆರೆತಾಗ
ಅಪರಿಚಿತ ಸ್ನೇಹ !!

ಬೊಗಸೆಯಲ್ಲಿ ಮಳೆ

ಹಿಡಿದಿಡಲಾಗದು ಎಕೋ ಎನೋ..

ಬೊಗಸೆಯಲ್ಲಿ ಮಳೆಯನ್ನು

ಕಣ್ಣಲ್ಲೇ ತುಂಬಿಕೊಳ್ಳುತ್ತೇನೆ

ಮಳೆಗಾಲದ ಆ ದಿನಗಳ

ಮತ್ತೆ ಮಳೆ ಬರಲು

ಕಂಬನಿಗಿಲ್ಲ ಯಾವ ಅಣೆಕಟ್ಟೂ

ಜಾರುತ್ತದೆ ಮಳೆ ಹನಿ

ಕೆನ್ನೆ ಮೇಲೆ, ಬೆಚ್ಚಗೆ

ಈ ಬಾರಿಯ ಮೊದಲ ಮಳೆ

ಮಣ್ಣ ಕಂಪ ಜೊತೆಗೆ ತಂದಿದೆ..

ಬದುಕು ಬೆದರುತ್ತದೆ

ನೆನಪ ಹನಿಗಳಿಗೆ

ನೆಲಕೆ ತಾಕದಂತೆ ಆ ಹನಿಗಳು

ಮತ್ತೆ ಕೈ ಚಾಚುತ್ತೆನೆ

ತಿಳಿದಿದೆ ನನಗೆ, ಬೊಗಸೆಯಲ್ಲಿ

ಮಳೆಯನ್ನು ಹಿಡಿದಿಡಲಾಗದೆಂದು

ಆದರೂ ಬೊಗಸೆಯೊಡ್ಡುತ್ತೇನೆ

ಏಕೋ, ಏನೋ..?!!

ಮೌನರಾಗ

ಮೊನ್ನೆ ಸಿಕ್ಕ ಗೆಳತಿ

ಕವಿತೆಯೊಂದ ಹೆಕ್ಕಿ

ಹಾಡಲು ನಾಚಿ ಮೌನವಾದಳು

ಮೌನರಾಗ ಎನಿತು ಇಂಪು!!!

ಪ್ರತಿಫಲನ

ಮುಂಜಾನೆಯ ಇಬ್ಬನಿ
ಕಣ್ಣಂಚಿನ ಕಂಬನಿ
ಕಣ್ಣೇರಿಗೆ ಕಾರಣಗಳೆಷ್ಟು?


ನಿರೀಕ್ಶೆಯ ಹೊಸ ಕಿರಣ
ಪ್ರತಿಫಲಿತ ಸಪ್ತವರ್ಣ
ಕನಸಿಗೆ ಬಣ್ಣಗಳೆಷ್ಟು?


ಒಡೆದ ಕನ್ನಡಿಯಲ್ಲಿ ಅದೇ ರೂಪ
ಮತ್ತದೇ ಕನಸಿನ ಪ್ರತಿಫಲನ...

ಚೆಲುವಿಗೆ

ಈ ಭುವಿಯೊಳು ಬೇರೇನಿದೆ ನಲ್ಲೆ
ನಿನ್ನ ಚೆಲುವಲ್ಲದೇ..

ಸಂಜೆ ಬಾನ ಹೊನ್ನ ಬಣ್ಣ
ನಲ್ಲೆ ನೀನು ನಾಚಿಯೇ..

ಕೊಗಿಲೇಯ ಗಾನದಿಂಪು
ನಿನ್ನ ಉಸಿರ ರಾಗವೇ

ಮೊಗ್ಗು ಅರಳಿ ಹೂವಾಗಿಹುದು
ನಿನ್ನ ನಗುವ ಕಂಡೊಡೆ

ಇರುಳ ಬಾನ ಮಿನುಗು ತಾರೆ
ಹೊಳೆಯುತಿಹುದು ಕಣ್ಣಲೇ

ಪೂರ್ಣ ಶಶಿಯು ಬೀಗುತಿಹನು
ನಿನ್ನ ಮೊಗದ ಹೊಳಪಲೇ

ಕವಿಯ ಎದೆಯ ಸ್ಪೂರ್ತಿ ಚಿಲುಮೆ
ಗೆಳತಿ ನಿನ್ನ ಚೆಲುವಲೇ...