ಸಮೀಕರಣ

ಸ್ನೇಹಿತರಾಗಿದ್ದೆವು ಈ ಮೊದಲು

ನಾನೂ ನೀನೂ

ಆದರೆ,

ಈ ಸಂಬಂಧಗಳ ಸಮೀಕರಣ

ಬದಲಾಗಲು ಜಾಸ್ತಿ

ಸಮಯ ಬೇಕಿಲ್ಲ

ಮೊದ ಮೊದಲು ಬಾವಗಳ

ಗುಣಾಕಾರ, ಕನಸುಗಳ ಕೂಡಿ

ಮುಂದಿನ ವಾರ

ಮತ್ತಿನ ತಿಂಗಳಲ್ಲೋಮ್ಮೆ

ಕಳೆದ ಸಮಯ; ನಡುವೆ

ಲೆಕ್ಕಕ್ಕೆ ಸಿಗದೆ ವ್ಯತ್ಯಯ

ಸಣ್ಣ ಪುಟ್ಟ ದಶಾಂಶಗಳೆಲ್ಲಾ

ಸೇರಿ, ಒಟ್ಟಾದ ಮೊತ್ತ

ಮುನಿಸು.

ಈಗಲೂ ಬದಲಾಗುತ್ತಿವೆ

ಸಮೀಕರಣಗಳು

ಮೊದಲಿನಂತೆಯೇ;

ಅಂದು ಕೂಡಿದ್ದೆವು

ಇಂದು ಕಳೆದಿದ್ದೇವೆ

ಅಷ್ಟೇ...!!!

ಮತ್ತೆ ಇನ್ಯಾರೋ ಹೋಸಬರು

ಅದೇ ಹಳೇ ಸಮಿಕರಣಗಳನ್ನು

ಗೀಚುತ್ತಾರೆ,,,

ತಮ್ಮ ಮನದ ಹಾಳೆಯಲ್ಲಿ;

ಏನೋ ಸಾಧಿಸ ಹೊರಟವರಂತೆ

ಹೊಸತಾಗಿ...

ಪಾಪ ! ಅವರಿಗೆನು ಗೊತ್ತು

ಸಂಬಂಧಗಳ ಸಮೀಕರಣ

ಬದಲಾಗುತ್ತಿರುತ್ತದೆಂದು??!!

ಅವರೂ ಅಷ್ಟೇ

ಇಂದು ಕೂಡಿದ್ದಾರೆ

ನಾಳೆ ಕಳೆಯುತ್ತಾರೆ...

ನೀನೆಂದರೆ

ನೀನೆಂದರೆ ನೆನಪು ಗೆಳತಿ

ಬಾಲ್ಯದ ಸವಿ ಮೆಲುಕು

ನೀನೆಂದರೆ ಕನಸು ಗೆಳತಿ

ನಾಳೆಯ ಬದುಕಿನ ಮಾತು

ನೀನೆಂದರೆ ಮಮತೆ ಗೆಳತಿ

ಅಮ್ಮನ ಸೆರಗಿಗೆ ಉಜ್ಜಿದ ಕಣ್ಣೀರು

ನೀನೆಂದರೆ ಒಲವು ಗೆಳತಿ

ಬರೆಯಲಾಗದ ಕವನ

ನೀನೆಂದರೆ ನಿರೀಕ್ಷೆ ಗೆಳತಿ

ಕಣ್ಣಿನಂಚಿನ ಕಾಮನೆ

ನೀನೆಂದರೆ ಬದುಕು ಗೆಳತಿ

ಅನಿರೀಕ್ಷಿತ ಹಾದಿಯ ತಿರುವು

ನೀನೆಂದರೆ ಕಡಲು ಗೆಳತಿ

ಅಮೃತ ಅಲೆಗಳ ಒಡಲು

ಉಮ್ಮಳಿಸುತ್ತವೆ ಬಾವಗಳು

ಒಮ್ಮೊಮ್ಮೆ ತಡೆಯಲಾಗದಂತೆ

ಮತ್ತೋಮ್ಮೆ ತದವರಿಸುತ್ತದೆ

ಪದಗಳಾಗದಂತೆ

ಎಲ್ಲವನೂ ಹೇಳಿಬಿಡುತ್ತದೆ

ಕಣ್ಣು ಬಚ್ಚಿಡಲಾಗದೆ

ಪದಗಳಿಗೊಂದು ರಾಗ ಸಿಗದೆ

ಕಮರುತ್ತದೆ ಬಯಕೆಗಳು

ಕಂಠದಲ್ಲೇ ಅಸುನೀಗುತ್ತದೆ

ರಾಗಗಳು ಹಾಡಲಾಗದಂತೆ

ಯಾವುದು ಸ್ಥಾಯೀ?

ಮೌನವೋ ರಾಗವೋ?

ಹಾಳೆಯ ಮೇಲಿನ ಪದಗಳು

ಮುಕ್ತಿಗಾಗಿ ಕಾದಿವೆ

ಹಾಡು ಹಕ್ಕಿಯ ಕಂಠದ ಇಂಪು

ಶೃತಿಯ ಮರೆತು ಕುಳಿತಿದೆ.

ರಾತ್ರಿ ರಾಣಿ ಅರಳುತ್ತದೆ

ಚಂದಿರನ ಮೆಲುನಗೆಗೆ

ಬೆಳದಿಂಗಳ ಹೊದಿಕೆ

ಹೊರೆಯಾಗುತ್ತದೆ ಮೌನ

ರೆಪ್ಪೆಗಳೆಡೆಯಲ್ಲೇ ಅವಿತಿದೆ

ಕನಸು ಮತ್ತೆ ಹುಟ್ಟಲು

ನಿರೀಕ್ಷೆಯಿಲ್ಲದ ಕಣ್ಣ

ಮುಚ್ಚಲೇಕೋ ಒಲ್ಲೆ

ದಿಟ್ಟಿಸುತ್ತಲಿ ಹೊಳೆವ ತಾರೆಗಳ

ಕಣ್ಣಂಚಲಿ ಉಲ್ಕಾಪಾತ

ವೇದನೆ ನೀವೇದನೆ

ಎಲ್ಲಾ ಮಾಫಿ

ನಿದಿರೆಯ ತೆಕ್ಕೆಗೆ ಜಾರಿದಂತೆಲ್ಲಾ

ನೆಮ್ಮದಿಯ ರಾತ್ರಿ.

ಹೆಜ್ಜೆ ಗುರುತುಗಳು

ಒದ್ದೆ ಮರಳ ಮೇಲಣ

ಹೆಜ್ಜೆ ಗುರುತುಗಳು

ಎಷ್ಟು ಕಾಲ ಇರಬಹುದು?!

ಕಡಲ ಅಲೆಗಳ
ಸಣ್ಣ ಹೊಡೆತಕ್ಕೇ

ಅಳಿಸಿ ಹೋಗಬಹುದು

ಮರಳ ಮೇಲಣ

ಹೆಜ್ಜೆ ಗುರುತುಗಳು

ಅಲೆಗಳ ಮರ್ಜಿಗೆ

ಕಟ್ಟು ಬಿದ್ದಿವೆ

ಆದರೆ...

ಮನದ ಮೇಲಣ

ಹೆಜ್ಜೆ ಗುರುತುಗಳು

ಅವಕ್ಕೆ ಯಾರ ಹಂಗಿವೆ?!

ಒಮ್ಮೆ ಒಡ ಮೂಡಿದರೆ ಸಾಕು

ಅಳಿಸಲಾಗದ ಗುರುತು

ತನ್ನ ಇರುವನ್ನು

ಮರೆಯಗೊಡದು

ಎಂದೋ ಸವೆಸಿದ ಹಾದಿಯ

ಸವಿ ನೆನಪಾಗಿ ಉಳಿದೇ ಬಿಡುತ್ತದೆ

ಎದೆಯಾಳದಲೆಲ್ಲೋ..

ಯಾರೋ ಅಪರಿಚಿತರು

ನಮ್ಮವರಾಗಿ ಇಟ್ಟ ಹೆಜ್ಜೆ

ಕಾಡುತ್ತದೆ, ಅವರಿಗೆ

ವಿದಾಯ ಹೇಳಿದ ನಂತರವೂ

ಹೃದಯ ಕಾಯುತ್ತದೆ

ಆ ಅಲೆಗಳಿಗಾಗಿ

ಎದೆಯ ಮೇಲಣಹೆಜ್ಜೆ ಗುರುತುಗಳ

ಅಳಿಸುವ ಸಲುವಾಗಿ

ಕಡಲ ತಡಿಯ

ಹೆಜ್ಜೆಗಳು

ಅಳಿಸಿದಂತೆಲ್ಲಾ

ಹೊಸಾ ಹೆಜ್ಜೆಗಳು

ಮತ್ತೆ ಮರಳ ಮೇಲೆ

ಚಿತ್ತಾರ ಮೋಡಿಸುತದೆ

ಮರಳ ಮೇಲಣ

ಹೆಜ್ಜೆ ಗುರುತುಗಳು

ಮತ್ತೆ ನೆನಪ ಕೆದಕುತ್ತದೆ...

ಆಷಾಡದ ಹೈಕುಗಳು

ಚಂದಿರನಿಲ್ಲದ ಇರುಳು
ಆಷಾಡದ ಗಾಳಿ
ನಿಟ್ಟುಸಿರು.


ನೀನಿಲ್ಲದೆ
ಬೆಳದಂಗಳು
ಉರಿಬಿಸಿಲು.


ಆಷಾಡದಿರುಳು
ಮೇಘಗಳ ಮರೆಯಲ್ಲಿ ಚಂದ್ರ
ಧರೆಗೆ ವಿರಹ.


ಆಷಾಡದ ಮಳೆಹನಿ
ಪ್ರೆಮಿಗಳ
ಕಂಬನಿ.


ಹುಣ್ಣಿಮೆಯ ರಾತ್ರಿ
ಒಂಟಿ ಚಂದಿರನಿಗೆ ಜೊತೆಯಾಗಲು
ಮೇಘಗಳ ಪೈಪೋಟಿ.


ವಸಂತದಿರುಳು
ರಾತ್ರಿರಾಣಿ ಅರಳಲು
ಚಂದ್ರೋದಯ.


ಹೂವು ಅರಳಿದಾಗ
ಮೊಡಿದ ಬಾವ
ಪ್ರೇಮ.


ನನ್ನವಳು ನಗಲು
ಬೆಳದಿಂಗಳ ಬೆಳಗು
ಚಂದಿರನಿಗೆ ಅಸೂಯೆ.

ಅಪರಿಚಿತರು

ಕತ್ತಲಲ್ಲಿ ಕರಗುವಾಗ
ನನ್ನಲ್ಲೇ ನಾ ಮರುಗುವಾಗ
ನಿನ್ನದೇ ನೆನಪು

ಅತ್ತು ಸಾಕಾದಾಗ
ಕಣ್ಣೊರಸಿ ನಕ್ಕಾಗ
ನಿನ್ನದೇ ನಗು


ದುಃಖಗಳ ಮರೆತಾಗ
ಸಂತಸದಿ ನಲಿದಾಗ
ನೀನೇ ಜೊತೆ

ಹೊತ್ತು ಕೊಲ್ಲುವಾಗ
ಏಕಾಂತವನು ಗೆಲ್ಲುವಾಗ
ನಿನ್ನದೇ ಮುಖ

ಕಷ್ಟವನು ಗೆದ್ದಾಗ
ಸಾರ್ಥಕಥೆಯ ಪಡೆದಾಗ
ನಿನ್ನದೇ ಹೆಸರು

ಮೌನವ ಮರೆತಾಗ
ಮಾತಿನ ಸವಿ ದೊರೆತಾಗ
ನಿನ್ನದೇ ನುಡಿ

ಮಳೆಯಲಿ ತೊಯ್ದಾಗ
ಕಣ್ಣಂಚು ನೆನೆದಾಗ
ನಿನೇ ಹನಿ

ಗೆಳೆತನ ಮುರಿದಾಗ
ನೀ ನನ್ನ ಮರೆತಾಗ
ನೀನೆಷ್ಟು ದೂರ !

ಮತ್ತೆ ನೀ ಸಿಕ್ಕಾಗ
ಕಣ್ಣುಗಳು ಬೆರೆತಾಗ
ಅಪರಿಚಿತ ಸ್ನೇಹ !!